ဘေယန်မြူးနစ်ဟာ မနေ့ညက ပွဲမှာ စတုဂတ်ကို ဂိုးပြတ် အနိုင်ယူခဲ့ပြီးနောက် ရာသီမကုန်ခင်မှာပဲ ဘွန်ဒက်စ်လီဂါ ချန်ပီယံ ဖြစ်လာခဲ့ပါတယ်။ ဒါပေမယ့်လည်း နည်းပြ ဗင်းန်ဆင့် ကွန်ပနီ ကတော့ ချန်ပီယံလိဂ်နဲ့ ဂျာမန် ပိုကယ်ဖလားတွေ ကိုပါ ဆက်လက် ဆွတ်ခူးချင်နေပါတယ်။
စတုဂတ်ကို အနိုင်ယူပြီး ဘွန်ဒက်စ်လီဂါ ချန်ပီယံ ဖြစ်လာပြီးနောက် ဘေယန်မြူးနစ် နည်းပြ ကွန်ပနီဟာ သူရဲ့ အာရုံစိုက်မှုကို ချန်ပီယံလိဂ်နဲ့ ဂျာမန် ပိုကယ်ဖလား ပွဲစဉ်တွေဆီ ချက်ချင်း ပြောင်းလဲလိုက်တာ ဖြစ်ပါတယ်။ အလိုင်းရန့်ဇ် အရီနာကွင်းမှာ ကစားခဲ့တဲ့ အဲဒီ ပွဲစဉ်မှာ ဘေယန်မြူးနစ်ဟာ စတုဂတ်ကို တစ်ဂိုး အရှုံး ကနေ နောက်က လိုက်ကစားခဲ့ရပေမယ့် ၂-၄ ရလဒ်နဲ့ အနိုင်ရရှိခဲ့တာပါ။ ဒါကြောင့် ဘေယန်မြူးနစ်ဟာ စောစောစီးစီးပဲ သူတို့ အသင်း သမိုင်းတလျှောက် ၃၅ ကြိမ်မြောက် ဘွန်ဒက်စ်လီဂါ ချန်ပီယံဆုကို သိမ်းပိုက်နိုင်ခဲ့တာ ဖြစ်ပါတယ်။
ပွဲချိန် ၂၁ မိနစ်မှာ ခရစ် ဖူးရစ်ချ်က စတုဂတ် အတွက် ဦးဆောင်ဂိုး သွင်းခဲ့ပေမယ့် ၆ မိနစ် အတွင်း မှာတင် ရာဖေးလ် ဂွါရဲရိုး၊ နီကိုးလက်စ် ဂျက်ဆန်နဲ့ အဲလ်ဖွန်ဆို ဒေးဗစ် တို့က ၃ ဂိုး ဆက်တိုက် သွင်းယူပြီး ပွဲကို အလှည့်အပြောင်း ဖြစ်စေခဲ့ပါတယ်။ ဒုတိယပိုင်း မှာတော့ လူစားဝင်လာတဲ့ ဟယ်ရီကိန်းက စတုဂတ်ရဲ့ မျှော်လင့်ချက်ကို ရိုက်ချိုးမယ့် စတုတ္ထဂိုးကို သွင်းယူခဲ့ပါတယ်။
စနေနေ့က ဒေါ့မန်တို့ ဟော့ဖန်ဟိမ်းကို ရှုံးနိမ့်ခဲ့တာကြောင့် ဘေယန်မြူးနစ်ဟာ ပွဲစဉ် ၄ ပွဲ အလိုမှာတင် ချန်ပီယံဆုကို ဆွတ်ခူးနိုင်ခဲ့တာ ဖြစ်ပါတယ်။ ဒါဟာ ဘွန်ဒက်စ်လီဂါ သမိုင်းတစ်လျှောက် ပဉ္စမမြောက် အစောဆုံး ချန်ပီယံ ဖြစ်ခွင့် ရရှိခဲ့တာလည်း ဖြစ်ပါတယ်။ ဘေယန်ဟာ အခုရာသီမှာ လိဂ် သွင်းဂိုး ၁၀၉ ဂိုး အထိ သွင်းယူထားပြီး စံချိန်သစ်တင်ထားသလို၊ ကျန်ရှိတဲ့ ၄ ပွဲစလုံး အနိုင်ရရင် ၂၀၁၂-၁၃ ရာသီက ယုဟေး ကန့်စ်ရဲ့ ဘေယန် အသင်း တင်ထားတဲ့ ၉၁ မှတ် စံချိန် ကိုလည်း လိုက်မီမှာ ဖြစ်ပါတယ်။
ဒါပေမယ့် ကွန်ပနီ ကတော့ လာမယ့် ဗုဒ္ဓဟူးနေ့မှာ ကစားရမယ့် လေဗာကူဆင်နဲ့ ပိုကယ်ဖလား ဆီမီးဖိုင်နယ် ပွဲစဉ်နဲ့ ဧပြီ ၂၈ ရက်မှာ ကစားရမယ့် ပီအက်စ်ဂျီနဲ့ ချန်ပီယံလိဂ် ဆီမီးဖိုင်နယ် ပထမအကျော့ ပွဲစဉ်တွေကိုပဲ အာရုံစိုက်နေပါတယ်။ ကွန်ပနီက “ဒါဟာ တကယ့်ကို ကောင်းမွန်တဲ့ ခံစားချက်ပါ။ ကျွန်တော့် အတွက်တော့ ချန်ပီယံဆုတိုင်းဟာ ပထမဆုံး ရတဲ့ ဆုလိုပါပဲ။ ဒီလို အောင်မြင်မှုတွေရဲ့ နောက်ကွယ်မှာ နှစ်ပေါင်းများစွာ ကြိုးစား အားထုတ်ခဲ့ရတာတွေ ရှိတာကြောင့် ကျွန်တော်တို့ ပျော်ရွှင်သင့်ပါတယ်။ ဒါပေမယ့် ရာသီက မကုန်သေးပါဘူး။ ဆွတ်ခူးရမယ့် ဖလားတွေ ကျန်ပါသေးတယ်။” လို့ ဆိုပါတယ်။
အဲဒီနောက် ကွန်ပနီက လာမယ့် ချန်ပီယံလိဂ် ပွဲစဉ်နဲ့ ပတ်သတ်ပြီးတော့လည်း “ချန်ပီယံလိဂ်က ပီအက်စ်ဂျီဟာ လက်ရှိ ချန်ပီယံ ဖြစ်ပြီး အခက်ခဲဆုံး စိန်ခေါ်မှု ဖြစ်မှာပါ။ ဒါပေမယ့် အဲဒီမတိုင်ခင် လေဗာကူဆင်နဲ့ ပွဲရှိပါသေးတယ်။” လို့ ဆက်လက် ပြောကြားခဲ့ပါတယ်။
ဘေယန်မြူးနစ်ဟာ ၂၀၁၉-၂၀ ရာသီ နည်းပြ ဟန်ဆီ ဖလစ်ခ် လက်ထက် နောက်ပိုင်း ဖလား သုံးလုံး မရရှိခဲ့တာကြောင့် အခုအခါ ကွန်ပနီက အဆိုပါ ဆုဖလား ငတ်မွတ်မှုကို အဆုံးသတ်ဖို့ အခြေအနေ ကောင်းနေပါတယ်။ စာရင်းဇယားတွေအရ ဘေယန်ဟာ ချန်ပီယံလိဂ် ရနိုင်ခြေ ၃၅ ရာခိုင်နှုန်း ရှိပြီး သူတို့ထက် သာလွန်တာ ဆိုလို့ အာဆင်နယ် (၃၈ ရာခိုင်နှုန်း) တစ်သင်းတည်းသာ ရှိပါတယ်။ ဒါပေမယ့်လည်း အာဆင်နယ်ဟာ လက်ရှိမှာ ပြည်တွင်းဖလားပွဲတွေ ကနေ ထွက်ခွာခဲ့ရပြီး လိဂ်ဇယား မှာလည်း မန်စီးတီးရဲ့ ဖိအားပေးမှုကို ခံနေရပါတယ်။
“ကျွန်တော်တို့ ရရှိထားတဲ့ အောင်မြင်မှုကို အောင်ပွဲခံဖို့ အချိန် အများကြီး ရပါဦးမယ်။ ဒါပေမယ့် အခုက နောက်ထပ် ဘာတွေ ထပ်ရနိုင်မလဲဆိုတာကို အပြည့်အဝ အာရုံစိုက်ရမယ့် အချိန်ပါ။ ကစားသမားတွေ အနေနဲ့ အနားယူပြီး လေဗာကူဆင်နဲ့ ပွဲအတွက် ပြင်ဆင်ရပါမယ်။ ဒီညတော့ ဝိုင်နီ တစ်ခွက်လောက် သောက်ပြီး အောင်ပွဲခံနိုင်ပေမယ့် မနက်ဖြန် မှာတော့ အလုပ် ပြန်လုပ်ကြရမှာပါ။” လို့ ကွန်ပနီက ဖြည့်စွက် ပြောကြားခဲ့ပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်
